Jashari: Luftën që fituam me gjak nuk mund ta humbim në tavolinë

Mbrojtja e luftës së drejtë të UÇK dhe shtetit tonë është obligim i secilit qytetar dhe kjo kërkon unifikim të të gjithë spektrit politik sepse vetëm të bashkuar mund ta fitojmë edhe këtë betejë.

Ky ishte mesazhi i familjes Jashari në akademi përkujtimore të organizuar për nder të Epopesë së Ushtrisë Çlirimtare të Kosovës, shkruan KosovaPress.

Në emër të familjes Jashari të pranishmëve me një fjalë rasti iu drejtuar Bekim Jashari, i cili tha se Epopeja e UÇK-së na kujton historinë e lavdishme popullit tonë, luftën e shumë brezave që nuk kursyen asgjë për lirinë dhe pavarësinë e vendit tonë.

“Shtetin që krijuam falë tyre që nuk kursyen as jetën, tani e kemi amanet që ta duam e ta zhvillojmë në mënyrë që të rinjtë tanë dhe gjeneratat që vinë të gjejnë perspektiven dhe të ardhmen e tyre në Kosovë. Është një brengë që nga paslufta ikja e të rinjve tonë nga Kosova. Është betejë që nuk guxojmë ta humbim, është amanet nga të parët tanë që kjo tokë e mbushur me gjak të frymojë shqip, që të rinjtë tanë të rriten e edukohen në vendin e baballarëve të tyre, që pavarësisht përndjekjeve që kishin nga pushteti i egër i ish-Jugosllavisë nuk e braktisen asnjëherë tokën e të parëve tyre“, tha ai.

LEXONI GJITHASHTU:

• Vëllai i Adem Jasharit në Kuvend: Bashkohuni, të ndahemi përgjithmonë nga Serbia
• 25-vjetori i epopesë së UÇK-së, liderët e Kosovës përkujtojnë familjen Jashari