Kallas: Anëtarët e BE-së do të diskutojnë se si të rihapin Ngushticën e Hormuzit

Shefja e politikës së jashtme të BE-së, Kaja Kallas ka deklaruar këtë të hënë se është në interesin e Evropës që Ngushtica e Hormuzit të mbahet e hapur dhe shtetet anëtare do të diskutojnë se çfarë mund të bëjnë. Kjo deklaratë e saj erdhi përpara një takimi të Këshillit të Punëve të Jashtme në Bruksel.

“Është në interesin tonë ta mbajmë të hapur Ngushticën e Hormuzit dhe për këtë arsye po diskutojmë edhe se çfarë mund të bëjmë në këtë drejtim”, u tha Kallas gazetarëve.

Ajo theksoi se kanë qenë në kontakt me aleatët amerikanë në nivele të ndryshme për këtë çështje, por shtoi se situata është shumë e paqëndrueshme. Kallas gjithashtu tha se ndërhyrja është jashtë fushës së veprimit të NATO-s pasi nuk ka vende të aleancës në Ngushticën e Hormuzit.

“Ne kemi qenë në kontakt me NATO-n më parë, por kjo është vërtet jashtë zonës së ndërhyrjes së NATO-s. Kjo është arsyeja pse kemi Operacionin Aspides, dhe ka shtete anëtare të gatshme të kontribuojnë, si në ‘koalicionin e të gatshëmve’ ashtu edhe në vetë operacionin, por është një zonë jashtë territorit të NATO-s. Nuk ka vende të NATO-s në Ngushticën e Hormuzit”, tha ajo.

Komentet e saj erdhën ndërsa presidenti amerikan Donald Trump rriti presionin mbi aleatët e SHBA-së për të dërguar anije për të ndihmuar në sigurimin e ngushticës, duke paralajmëruar se NATO përballet me një të ardhme shumë të keqe nëse vendet nuk arrijnë të ndihmojnë.