Kallas: Rusia po i bën premtime boshe Trumpit me planin e ri të paqes

Rusia po i bën thjesht “premtime boshe” Donald Trump duke hartuar një plan të ri paqeje për t’i dhënë fund luftës në Ukrainë, tha të enjten Përfaqësuesja e Lartë Kaja Kallas, ndërsa dyfishoi thirrjet që evropianët të kenë një vend në tryezën e bisedimeve.

Paralajmërimi i saj vjen mes raportimeve rreth  planit 28-pikësh, të hartuar pas dyerve të mbyllura nga Shtetet e Bashkuara dhe Rusia, pa kontributin e Ukrainës.

“Qëndrimi ynë nuk ka ndryshuar. Që çdo plan paqeje të ketë sukses, ai duhet të mbështetet nga Ukraina dhe duhet të mbështetet nga Evropa”, tha Kallas pas një takimi të ministrave të punëve të jashtme në Bruksel.

“Nëse Rusia donte vërtet paqe, ajo do ta kishte pranuar ofertën e armëpushimit pa kushte që në mars. BE-ja ka një plan shumë të qartë me dy pika: së pari, dobësimi i Rusisë; së dyti, mbështetja e Ukrainës”, shtoi ajo.

Plani i supozuar i paqes SHBA-Rusi thuhet se përfshin kushte shumë të pafavorshme për Kievin, të tilla si dorëzimi i plotë i Donbasit, të cilin forcat ruse nuk kanë arritur ta kontrollojnë plotësisht, dhe kufizime në madhësinë e ushtrisë dhe arsenalit të armëve të Ukrainës.

Evropianët nuk ishin të përfshirë në iniciativë, e cila duket se është udhëhequr nga Kirill Dmitriev, i dërguari special i Rusisë, dhe më pas i është kaluar Steve Witkoff, i dërguari special i SHBA-së.

Kallas argumentoi se një nga arsyet pse Rusia po harton plane të reja paqeje dhe po tregon një “fytyrë të mirë përsëri” është sepse ka “frikë” nga humbja e aseteve, pasi sipas skemës së propozuar, Moska do të rikuperonte fondet vetëm nëse ofron kompensim për dëmin e shkaktuar nga pushtimi i saj në shkallë të plotë.

“Kredia e dëmshpërblimeve është mënyra më e qartë për të mbështetur mbrojtjen e Ukrainës. Është gjithashtu mënyra për t’i treguar Rusisë se koha nuk është në anën e saj”, është shprehur ajo.

LEXONI GJITHASHTU:

• Kallas: Europa duhet të përgatitet për luftë, nëse duam paqe
• Kallas: Sistemi i mbrojtjes ajrore nga dronët do të jetë funksional brenda dy vitesh