Kamionët me ndihma të OKB-së hyjnë në Gaza

Kamionët me ndihma humanitare të Kombeve të Bashkuara kanë hyrë sot në enklavën palestineze përmes pikës kufitare “Zikim”, e cila kontrollohet nga ushtria izraelite.

Ndërkohë, Fondacioni Humanitar i Gazës, i mbështetur nga Shtetet e Bashkuara, ka filluar të operojë më 27 maj përmes qendrave të përzgjedhura, duke anashkaluar mekanizmat e zakonshëm të shpërndarjes përmes OKB-së dhe organizatave joqeveritare.

Kjo vjen në një kohë kur situata në terren vazhdon të përkeqësohet. Dhjetëra civilë janw vrarw apo plagosur çdo ditë në përpjekje për të siguruar ushqim, mes një krize humanitare të thellë. Komuniteti ndërkombëtar ka kërkuar hetim të pavarur mbi vrasjet pranë vendeve të shpërndarjes së ndihmave.

Që nga tetori 2023, kur shpërtheu ofensiva izraelite ndaj Gazës, më shumë se 56 mijë palestinezë janë vrarë, shumica gra dhe fëmijë, sipas burimeve lokale. Izraeli ka refuzuar thirrjet për një armëpushim, ndërsa përballet me akuza ndërkombëtare për krime lufte dhe gjenocid.

Në nëntor 2024, Gjykata Ndërkombëtare Penale lëshoi urdhër-arreste për Kryeministrin Benjamin Netanyahu dhe ish-ministrin e Mbrojtjes Yoav Gallant, duke i akuzuar për krime kundër njerëzimit në Gaza.

Ndërkohë, Gjykata Ndërkombëtare e Drejtësisë po shqyrton një padi të ngritur kundër Izraelit për gjenocid në enklavën e rrethuar.

LEXONI GJITHASHTU:

• Trump: I dërguari për Lindjen e Mesme më tha se armëpushimi në Gaza është afër
• Spanja i kërkon BE-së të pezullojë marrëveshjen me Izraelin për luftën në Gaza