Kanadaja, Australia dhe Britania e Madhe njohin zyrtarisht Palestinën si shtet

Në një zhvillim historik diplomatik, tre vende të fuqishme perëndimore, Kanadaja, Australia dhe Mbretëria e Bashkuar , kanë shpallur këtë të diel njohjen zyrtare të Shtetit të Palestinës.

Kjo lëvizje e koordinuar vjen në prag të Konferencës së Asamblesë së Përgjithshme të Kombeve të Bashkuara në Nju Jork, ku çështja e shtetësisë palestineze pritet të jetë në qendër të diskutimeve globale.

Kanadaja: “Njohim Shtetin e Palestinës”

Kryeministri kanadez Mark Carney deklaroi përmes një postimi në platformën X (ish-Twitter):

“Kanadaja njeh Shtetin e Palestinës dhe ofron partneritetin tonë në ndërtimin e premtimit të një të ardhmeje paqësore, si për Shtetin e Palestinës ashtu edhe për Shtetin e Izraelit.”

Ky vendim shënon një kthesë të rëndësishme në politikën e jashtme kanadeze dhe e vendos Kanadanë në mesin e vendeve të G7 që mbështesin zyrtarisht një zgjidhje me dy shtete në Lindjen e Mesme.

Brenda pak minutash, pas deklaratës së Otavës, edhe kryeministri australian Anthony Albanese njoftoi njohjen e Palestinës si shtet sovran.

“Australia i bashkohet Kanadasë dhe Mbretërisë së Bashkuar në një përpjekje të përbashkët ndërkombëtare për një zgjidhje me dy shtete”, tha Albanese.

Australia kishte paralajmëruar më parë synimin për ta ndërmarrë këtë hap gjatë punimeve të OKB-së këtë javë.

Më pas, edhe Mbretëria e Bashkuar bëri të ditur qëndrimin e saj zyrtar. Kryeministri britanik Sir Keir Starmer deklaroi:

“Sot, për të ringjallur shpresën e paqes për palestinezët dhe izraelitët, dhe për një zgjidhje me dy shtete, Mbretëria e Bashkuar njeh zyrtarisht Shtetin e Palestinës.”

Starmer theksoi se momenti për të vepruar ka ardhur, duke shtuar se “përballë tmerrit në rritje në Lindjen e Mesme, ne po veprojmë për të mbajtur gjallë mundësinë e paqes dhe të një shteti palestinez të qëndrueshëm përkrah një Izraeli të sigurt”.

Vendimi britanik përmbush një zotim të mëparshëm të qeverisë, i cili kushtëzonte njohjen e Palestinës me përmbushjen e kushteve të caktuara nga ana e Izraelit — kushte që, sipas zyrtarëve britanikë, nuk janë përmbushur.

LEXONI GJITHASHTU:

• Britania e Madhe pritet të shpallë sot njohjen e shtetit të Palestinës
• Kryetarë komunash në Francë do vendosin flamurin palestinez
• Franca përgatitet të njohë Shtetin e Palestinës më 22 shtator
• Trump kundërshton njohjen e shtetit palestinez nga Britania