Kanadaja i bashkohet programit të mbrojtjes të BE-së

Kanadaja i është bashkuar fondit më të madh të mbrojtjes të Bashkimit Evropian, tha të hënën zyra e Kryeministrit Mark Carney, ndërsa vendi synon të diversifikojë shpenzimet e tij ushtarake larg Shteteve të Bashkuara.

Plani u lejon kompanive kanadeze të mbrojtjes të kenë akses në një program huash të Bashkimit Evropian prej 150 miliardë eurosh, i njohur si Veprimi për Sigurinë e Evropës, ose SAFE. Kjo do t’u mundësojë kompanive kanadeze të sigurojnë hua të lira, të mbështetura nga BE-ja, për të blerë pajisje ushtarake.

“Pjesëmarrja e Kanadasë në SAFE do të mbushë boshllëqet kyçe të kapaciteteve, do të zgjerojë tregjet për furnizuesit kanadezë dhe do të tërheqë investime evropiane të mbrojtjes në Kanada,” tha Carney në një deklaratë. Kanadaja është vendi i parë jashtë BE-së që fiton akses.

Carney ka thënë se synon të diversifikojë prokurimin e Kanadasë dhe të forcojë marrëdhëniet e vendit me BE-në.

Ai ka deklaruar më parë se më shumë se 70 centë nga çdo dollar i shpenzimeve kapitale ushtarake të Kanadasë nuk do të shkojnë më tek SHBA-ja. Veprimet e Presidentit amerikan Donald Trump, përfshirë nisjen e një lufte tregtare dhe sugjerimin që Kanadaja të bëhej shteti i 51-të i SHBA-së, i kanë zemëruar kanadezët dhe kanë krijuar mjedisin politik që Carney të fitojë postin e kryeministrit, pas premtimit për t’u përballur me agresionin në rritje të Trump.

Qeveria e Carney vazhdon të rishikojë blerjen e avionëve luftarakë F-35 nga SHBA-ja për të eksploruar opsione të tjera. Carney ka thënë se potenciali për të pasur më shumë prodhim në Kanada është një faktor. Një propozim nga kompania suedeze Saab premtoi se montimi dhe mirëmbajtja e avionit luftarak Saab Gripen do të kryheshin në Kanada.

Kanadaja ka thënë se do të përmbushë udhëzimet e shpenzimeve ushtarake të NATO-s deri në fillim të vitit të ardhshëm.

Bisedimet për Bashkimin e Mbretërisë së Bashkuar me fondin SAFE përfunduan pa marrëveshje javën e kaluar. Negociatat dështuan për shkak të parave, me Evropën që kërkonte më shumë për pjesëmarrjen e Britanisë sesa ajo ishte e gatshme të paguante.

LEXONI GJITHASHTU:

• Ukraina dhe Kanadaja bashkëpunojnë për të rritur presionin ndaj Rusisë
• Kanadaja njofton paketën e re të sanksioneve kundër Rusisë