Kandidati i vetëm serb për zgjedhjet në Mitrovicën e Veriut tërhiqet nga gara

Kandidati i vetëm serb në zgjedhjet e jashtëzakonshme për kryetar të komunës veriore të Mitrovicës, Aleksandar Arsenijeviç nga Iniciativa Qytetare “Mbijetesa serbe”, ka tërhequr kandidaturën e tij, ka konfirmuar sot zëdhënësi i Komisionit Qendror të Zgjedhjeve në Prishtinë, Valmir Elezi.

Elezi ka theksuar se Arsenijeviç ka dorëzuar njoftimin për tërheqje më 2 dhjetor, i cili sipas tij është brenda afatit ligjor të përcaktuar nga KQZ-ja.

“Mund të konfirmoj se më 2 dhjetor 2022, në afatin ligjor të përcaktuar nga Komisioni Qendror i Zgjedhjeve për tërheqjen e subjekteve politike, kemi marrë njoftim për tërheqjen e kandidatit të Iniciativës Qytetare “Mbijetesa serbe” Aleksandar Arsenijeviç nga gara për kryetar të Mitrovicës së Veriut.

Në Kosovë janë shpallur zgjedhjet e jashtëzakonshme lokale për 18 dhjetor në katër komuna në veri, pasi përfaqësuesit e serbëve nga veriu i Kosovës janë larguar nga institucionet lokale dhe katër komunat.

Dorëzimi i dorëheqjeve dhe largimet nga institucionet erdhi si shenjë kundërshtimi ndaj vendimit të Qeverisë së Kosovës për të nisur procesin e riregjistrimit të veturave me targa të qyteteve të Kosovës të lëshuara nga Serbia.

LEXONI GJITHASHTU:

• Delegacionet e Kosovës dhe RMV-së që pritet të mbërrijnë në samitin në Tiranë
• Marrëveshje me Kosovën? Daçiç: Serbia e ka bërë të qartë vijën e kuqe