Katari, Egjipti, SHBA dhe Spanja kërkojnë zgjatjen e armëpushimit në Gaza

Katari, Egjipti, Shtetet e Bashkuara dhe Spanja po punojnë për të siguruar zgjatjen e armëpushimit të përkohshëm midis Izraelit dhe Hamasit në Rripin e Gazës, tha sot nga Barcelona Ministri i Jashtëm i Autoritetit Palestinez Riyad al-Maliki.

Pasi bëri thirrje për një armëpushim të qëndrueshëm për të parandaluar vdekjet e mëtejshme të civilëve, Riyadh al-Maliki tha se armëpushimi aktual “mund të zgjatet për një, dy, tre ditë”, por shtoi se askush nuk e dinte për sa kohë.

Ministri i Jashtëm palestinez dha një konferencë për shtyp së bashku me homologun e tij spanjoll Jose Manuel Albarez gjatë punës së Forumit të Bashkimit për Mesdheun në Barcelonë.

Sot është dita e fundit e një armëpushimi katër-ditor të rënë dakord javën e kaluar midis Izraelit dhe Hamasit të ndërmjetësuar nga Katari dhe Shtetet e Bashkuara.

Një apel për një armëpushim universal dhe të qëndrueshëm në Gaza u drejtua edhe nga Ministri i Punëve të Jashtme të Arabisë Saudite, Faisal bin Farhan al-Saud , i cili po merr pjesë në Forumin e Barcelonës.

“Pauza është vetëm e përkohshme. Do të ketë rezultate të kufizuara nëse nuk pasohet nga një ndërprerje universale dhe e përhershme e armiqësive”, tha ministri i jashtëm saudit.

LEXONI GJITHASHTU:

• Vritet nga përplasja mes bandave ish-luftëtari i UÇK, e kapi plumbi “qorr” në banesë
• Bora “pushton” zonat malore të Elbasanit, shoferët duhet të lëvizin me zinxhirë