Kërcënohet juria e Trump, autoritetet në Xhorxhia nisin hetimet pas mesazheve online

Autoritetet në shtetin amerikan të Xhorxhias po hetojnë kërcënimet e bëra online ndaj anëtarëve të jurisë së madhe që paditi ish-presidentin Donald Trump ditën e hënë.

Informacione personale, përfshirë adresat dhe fotot e anëtarëve të jurisë, u ndanë në platformat e ndryshme të së djathtës në internet.

Zyra e sherifit të kontesë Fullton deklaroi se ishte në dijeni të kërcënimeve dhe se po përpiqej të identifikonte personat që fshihen pas tyre.

Emrat e anëtarëve të jurisë u publikuan në aktpadi, që është dhe një praktikë rutinë në shtetin e Xhorxhias.

Por pasi identitetet e tyre dolën në atë dokument, mbështetës të ish-presidentit publikuan informacione shtesë mbi ta online dhe postuan fotografitë dhe adresat e tyre në forume dhe rrjete sociale si “Telegram”.

Lajmi vjen vetëm pak ditë pasi juria votoi të padiste zotin Trump për 13 akuza, mes të cilave ajo e ndërhyrjes në zgjedhje. Ai i ka cilësuar të gjitha akuzat si të motivuara politikisht.

Zyrtarët e shtetit të Xhorxhias nënvizuan më tej se krahas informacioneve personale, ndaj pjesëtarëve të jurisë ishin publikuar edhe kërcënime, të cilat sipas policisë mund të arrijnë deri në nivelin e frikësimit.

Burimet shtuan se çështja po hetohet me seriozitet dhe në bashkëpunim me agjencitë ligjzbatuese federale.

LEXONI GJITHASHTU:

• Arrestohen dy zyrtarë në Kosovë, dyshime për korrupsion dhe abuzime me rezervat
• Arrestimet për sterilizimin, Berisha: Vendimet ishin në sirtar, i urdhëroi Rama