Khersoni është ukrainas, banorët ngrenë flamujt kombëtarë

Flamujt ukrainas u ngritën të premten në godinat zyrtare dhe festimet shpërthyen në qendër të Khersonit, pasi trupat ruse u tërhoqën.

Të gjithë ushtarët rusë kaluan në të majtë të lumit Dnipro, bëri të ditur zëdhënësi i Ministrisë së Mbrojtjes në Moskë, teksa njoftoi se tërheqja e njësive luftarake nga rajoni ukrainas i Khersonit kishte përfunduar.

“Ne nuk lejuam asnjë humbje nga personeli, armatimet, pajisjet ushtarake apo materiale të tjera. Gjithashtu, të gjithë civilët që deshën të largoheshin nga pjesa perëndimore e Khersonit u asistuan në evakuim”, tha Igor Konashenkov, zëdhënës i Ministrisë ruse të Mbrojtjes.

Kherson ishte qendra e parë madhore urbane që ra në duart e trupave ruse pasi presidenti Vladimir Putin njoftoi ndërhyrjen në Ukrainë, si dhe ishte i vetmi kryeqytet rajonal që trupat e tij pushtuan.

Por tani, sikurse ka thënë dhe presidenti Volodymyr Zelensky, “Khersoni është i ukrainasve”.

LEXONI GJITHASHTU:

• Mina dhe armë, çfarë la pas ushtria ruse pas tërheqjes nga Kherson
• A u çlirua me të vërtetë Kherson?