Kievi kërkon partneritet me gjigantët e industrisë ushtarake

Ukraina dhe Shtetet e Bashkuara do të mbajnë një konferencë mbi industrinë ushtarake më 6 dhe 7 dhjetor në Uashington.

Ajo do të zhvillohet në kuadër të përpjekjeve amerikane për të rritur prodhimin e armatimeve në mbështetje të Ukrainës dhe pritet që në të, të marrin pjesë lojtarët kryesorë të industrisë së mbrojtjes.

Kievi po përpiqet të gjejë një partneritet me prodhuesit e huaj të armëve për të zgjeruar kapacitetet e tij mbrojtëse, përballë mungesës së pajisjeve dhe sidomos municioneve.

Mediat ndërkombëtare raportojnë se furnizimi me artileri i Ukrainës është tkurrur pas fillimit të luftës në Gaza, pasi ndihmat amerikane janë devijuar për në Izrael.

Dy vatrat e luftës në Ukrainë aktualisht janë në Avdivka, në rajonin e Donjeckut, dhe krahu i majtë i lumit Dnipro, në rajonin e Khersonit.

Të dyja palët pretendojnë se i kanë shkaktuar njëra-tjetrës humbje të rënda në të dyja fushëbetejat. Ajo ukrainase ka deklaruar se humbjet ruse në Avdivka kanë qenë “katastrofike”, me ushtrinë agresore që po paguan çmimin e rrethimit të qytetit.

LEXONI GJITHASHTU:

• Gjermania thirrje Putin: Tërhiq trupat nga Ukraina
• Akuzohej për tradhti, arrestohet një ligjvënës ukrainas