Kievi në pritje të armëve, ushtarët ukrainas mirëpresin pajisjen me bomba thërrmuese

Ndërsa kundërofensiva ukrainase vazhdon, trupat e Kievit po përdorin gjithnjë e më shumë armë perëndimore, edhe pse shumica e luftimeve kryhet me pajisje të epokës sovjetike. Premtimi i NATO-s për më shumë armë është mirëpritur, por trupat në vijën e frontit i kërkojnë ato tani.

“Mendoj se vendet që na dhanë armatimet e kanë parë që ne kemi mësuar t’i përdorim ato, në përputhje me stërvitjen tonë në terren. Rrjedhimisht, ato do të na ndihmonin shumë dhe ne do ndihmonim njëri-tjetrin”, thotw Volodymir, ushtar ukrainas.

Vendimi i fundit i Shteteve të Bashkuara për t’i dhënë bomba thërrmuese Ukrainës u kundërshtua nga disa aleatë, por oficerët ukrainas thonë se ato janë jetike për kundërofensivën.

“Mendoj se është e drejtë që të përdorim të gjitha llojet e armëve për t’u mbrojtur. Ne nuk po luftojmë në territorin e tyre, por po mbrojmë territorin tonë, të cilin duam ta çlirojmë. Ne duam ta dëbojmë të keqen dhe t’i lëmë ata të bëjnë ç’të duan në tokën e tyre”, shprehet Igor, oficer ukrainas.

Analistët thonë se impakti real i armatimeve perëndimore nuk do të shihet derisa Ukraina të angazhojë pjesën dërrmuese të rezervistëve.