Kim Jong Un i gatshëm për të kthyer komunikimin me Korenë e Jugut

Lideri i Koresë së Veriut, Kim Jong Un, në një deklaratë përpara parlamentit të shtetit, ka thënë se është i gatshëm të rikthejë linjat e komunikimit me Korenë e Jugut para fillimit të tetorit, mirëpo vazhdon të refuzojë ofertat e Shteteve të Bashkuara për dialog.

Lideri komunist ka thënë se rikthimi i linjave të komunikimit në pikat kufitare, do të realizonte dëshirat e koreanëve për paqe në mes të dyja Koreve.

Koreja e Veriut ka bllokuar linjat e komunikimit në muajin gusht, si shenjë proteste kundër stërvitjeve të përbashkëta ushtarake në mes të Koresë së Jugut dhe Shteteve të Bashkuara.

Kim Jong Un ka akuzuar Korenë e Jugut për përkeqësim të tensioneve përmes ndërtimit të armëve dhe stërvitjeve ushtarake, si dhe ka akuzuar Shtetet e Bashkuara se kanë propozuar bisedime pa ndryshuar “politën armiqësore” ndaj Koresë së Veriut.

Përpara një jave Kim Yo-jong, motra e liderit komunist, bëri një deklaratë të ngjashme duke thënë se zyrtarë e Koresë së Veriut janë të gatshëm të rikthejnë bisedimet me Korenë Jugore, nëse kjo e fundit heq dorë nga “politikat armiqësore”.

Përmes një deklarate Kim Yo-jong u shpreh se ‘ajo prej së cilës duhet hequr dorë janë qëndrimet dypalëshe, shprehitë e këqija dhe qëndrimi armiqësor që arsyeton veprimet e veta, duke lënë fajin vetëm te e drejta jonë për t’u mbrojtur’.