Kina ka arrestuar më shumë se 80 persona të dyshuar për shitjen e vaksinave të rreme anticovid

Policia kineze ka arrestuar më shumë se 80 persona të dyshuar si pjesë e një grupi kriminal, i cili ka prodhuar dhe shitur vaksina të rreme kundër coronavirus-it, brenda dhe jashtë Kinës.

Agjencitë e lajmeve në Kinë kanë bërë me dije se zyrtarët policorë në Pekin kanë nisur operacionet pasi ka pasur dyshime se janë duke u prodhuar vaksina të rreme me përbërje të thjeshtë kripore.

Vaksinat janë shitur në Kinë dhe në shtete të tjera, ndonëse ende nuk janë bërë të ditur emrat e vendeve tjera.

Sipas të dhënave thuhet se ky grupi kriminal ishte aktiv që prej shtatorit të vitit të shkuar.

Zëdhënësi i Ministrisë së Jashtme kineze, Wang Wenbin lidhur me këtë situatë ka thënë se:

“Kina tashmë e ka raportuar këtë situatë në vendet e tjera. Qeveria kineze vlerëson sigurinë e vaksinës dhe do të vazhdojë të bëjë përpjekje për të ndjekur penalisht secilin falsifikim, shitje të rreme dhe biznes të paligjshëm.”