Kina miraton subvencion vjetor për fëmijët e vegjël, synohet rritja e lindjeve

Kina ka njoftuar një nismë të re kombëtare për të frenuar rënien e lindjeve dhe për të zbutur krizën demografike që ka kapur vendin. Prindërit në Kinë do të përfitojnë një subvencion vjetor prej 3,600 juanë (rreth 500 dollarë) për secilin fëmijë nën moshën tre vjeç.

Sipas mediave shtetërore, kjo masë do të mbulojë rreth 20 milionë familje dhe synon të lehtësojë barrën ekonomike të prindërve, pasi kostot e rritjes së fëmijëve në Kinë janë ndër më të lartat në botë në raport me të ardhurat.

Kjo është përpjekja e parë në shkallë kombëtare që ndërmerret nga autoritetet kineze pas heqjes së politikës së vetwm një fëmije, gati një dekadë më parë. Megjithëse vendi ka inkurajuar çiftet të kenë më shumë fëmijë, niveli i lindjeve vazhdon të bjerë, duke rritur shqetësimet për të ardhmen ekonomike dhe sociale të Kinës.

Në janar 2025, Byroja Kombëtare e Statistikave njoftoi se në vitin 2024 ishin regjistruar 9.54 milionë lindje, një rritje e lehtë në krahasim me vitin paraardhës. Megjithatë, popullsia totale pësoi rënie për të tretin vit radhazi, duke zbritur në rreth 1.4 miliardë banorë.

Plakja e popullsisë dhe tkurrja e fuqisë punëtore po konsiderohen si sfida serioze për zhvillimin afatgjatë të vendit dhe qëndrueshmërinë e sistemit të pensioneve. Kjo nismë e re shihet si një hap konkret për të ndaluar këtë trend, edhe pse ekspertët theksojnë se mund të kërkohen politika më gjithëpërfshirëse dhe të qëndrueshme për të nxitur lindshmërinë në mënyrë afatgjatë.

LEXONI GJITHASHTU:

• Kina: Përmirësimi i marrëdhënieve SHBA–Rusi kontribuon në paqen në botë
• “Jam i zhgënjyer nga Putini”, çfarë dimë nga shkurtimi i afatit të Trump për Rusinë
• Medvedev paralajmëron Trump: Ultimatumi është një hap drejt luftës me SHBA