Kina ndërpret kontaktet me presidentin çek për shkak të takimit me Dalai Lamën

Kina po ndërpret të gjitha kontaktet me presidentin çek Petr Pavel për shkak të takimit të tij me Dalai Lamën muajin e kaluar, njoftoi sot Ministria e Punëve të Jashtme kineze.

“Pavarësisht protestave të përsëritura dhe kundërshtimit të fortë nga Kina, Presidenti çek Petr Pavel udhëtoi për në Indi për t’u takuar me Dalai Lamën. Kjo shkel rëndë angazhimin politik të qeverisë çeke ndaj qeverisë kineze dhe shkel sovranitetin dhe integritetin territorial të Kinës”, tha zëdhënësi i Ministrisë së Jashtme kineze Lin Jian, sipas Reuters.

Ai tha se Kina shpreh kundërshtim të fortë dhe ndjen keqardhje të thellë për këtë ngjarje, prandaj i ka dërguar protesta serioze palës çeke.

“Duke pasur parasysh seriozitetin e veprimit provokues të Pavel, Kina ka vendosur të ndërpresë të gjitha kontaktet me të”, shtoi zëdhënësi Lin Jian.

Paveli u takua me Dalai Lamën, udhëheqësin shpirtëror tibetian që jetonte në mërgim në Indi, gjatë një udhëtimi privat në fund të korrikut për ta uruar për ditëlindjen e tij të 90-të.

Kina nuk e njeh qeverinë tibetiane në mërgim sepse e konsideron Tibetin pjesë të territorit të saj dhe akuzon Dalai Lamën si separatist.

Paveli dhe Kina janë përplasur tashmë për çështje të ngjashme, dhe presidenti i Republikës Çeke e zemëroi veçanërisht Pekinin zyrtar kur, menjëherë pas inaugurimit të tij në janar 2023, i bëri një ftesë presidentes së rajonit të Tajvanit të Kinës, Tsai Ing-wen.

LEXONI GJITHASHTU:

• Kina, prodhuesja më e madhe e plastikës në botë! E ndjekin 6 shtete të tjera
• Kina dhe Rusia përfundojnë ushtrimet detare 5-ditore në Detin e Japonisë