‘Vendimi për Berishën kaloi shumë nivele, kush habitet nuk është i sinqertë’, deklaron ambasadorja Kim

“Kur dikush përcaktohet nga Sekretari i Shtetit për korrupsion domethënës, zakonisht është shumë e dukshme. Mendoj se ata që thonë se janë të habitur, me gjasë nuk po tregohen fort të sinqertë,” deklaroi ambasadorja e SHBA në Tiranë znj. Yuri Kim në një intervistë për Zërin e Amerikës.

Sipas Kim, procesi i përcaktimit ose i kufizimit të hyrjes në SHBA është i gjatë dhe i detajuar thellësisht në shumë nivele shqyrtimi. Ambasadorja po i referohej pyetjes së gazetarit të VOA, Armand Mero për ish-kryeministrin Sali Berisha, i cili u shpall non grata nga Departamenti Amerikan i Shtetit në maj të këtij viti.

Ambasadorja e SHBA e justifikoi kohën e marrjes së vendimit pas tetë vitesh në opozitë të liderit historik të Partisë Demokratike në Shqipëri me kohën e gjatë që kërkon procesi.

“Dua të sqaroj që nuk është pjesë e ndonjë teorie të çmendur konspirative që vë në shënjestër politikën e brendshme këtu. Uashingtoni nuk merret me diçka të tillë,” tha Kim.

E pyetur lidhur me efikasitetin e një mase të tillë nëse autoritetet lokale të drejtësisë, nuk e shoqërojnë me ndonjë hetim, ambasadorja u shpreh se “në momentin që këto vendime çertifikohen nga Sekretari i Shtetit dhe shpallen nga Sekretari i Shtetit, ato janë shumë të dukshme dhe do të ishte me vend që autoritetet vendase të shikonin masat.”

Diplomatja amerikane shtoi më tej se fitimi i një mandati të tretë nga qeveria Rama i vendos kryeministrit socialist dhe kabinetit të tij përgjegjësinë për të shtuar nivelin e performancës mbi atë mesatar.

Kim citoi këtu reformën në drejtësi, institucionet e demokracisë, pastrimin e gjykatave, të drejtën e pronësisë, rritjen e investimeve të huaja dhe thellimin e marrëdhënieve në fushën e mbrojtjes me Shtetet e Bashkuara.

LEXONI GJITHASHTU:

• Ambasadorja Yuri Kim përshëndet arrestimet e zyrtarëve në Ministrinë e Brendshme 
• Ambasadorja Yuri Kim: Të jemi të pamëshirshëm kundër krimit, kriminelë të fuqishëm drejtojnë trafikimin
• Situata e zjarreve në vend, Yuri Kim takim në Pashaliman me Peleshin