Komisioni Evropian mirëpret misionin për inspektimin e dëmit të tubacionit në Ukrainë

Komisioni Evropian ka mirëpritur propozimin e përbashkët të Hungarisë dhe Sllovakisë për të dërguar një mision faktmbledhës që do të inspektojë pjesën e dëmtuar të tubacionit Druzhba, duke e cilësuar atë si një hap të parë drejt zbutjes së ngërçit mes dy vendeve dhe Ukrainës.

Komisioni nuk e përjashton mundësinë që t’i bashkohet një misioni të tillë, nëse autoritetet në Kiev japin miratimin. Megjithatë, plani mbetet në faza shumë të hershme dhe ekzekutivi evropian nuk ka një histori të gjatë pjesëmarrjeje në ushtrime të këtij lloji.

“E konsiderojmë këtë një hap të mirëpritur. Tani jemi në kontakt me autoritetet ukrainase për këtë çështje dhe vazhdojmë të punojmë me shtetet anëtare për të siguruar sigurinë e furnizimit”, deklaroi të premten Anna-Kaisa Itkonen, zëdhënëse e Komisionit për energjinë. “Duhet të ndërmarrim hapat e ardhshëm për të parë se çfarë forme do të marrë ky mision për mbledhjen e fakteve”, shtoi ajo.

Ndërkohë, kryeministri hungarez Viktor Orbán ka vënë veton ndaj një kredie prej 90 miliardë eurosh për Kievin, në shenjë kundërshtimi ndaj ndërprerjes së furnizimeve me naftë përmes Druzhbës. Ai ka akuzuar presidentin ukrainas Volodymyr Zelenskyy se ka vepruar për “konsiderata politike”.

Orbán, i cili përballet me zgjedhje më 12 prill, ndodhet aktualisht pas në sondazhet e opinionit me një diferencë dyshifrore. Hungaria dhe Sllovakia, që mund të vazhdojnë blerjen e naftës ruse falë një përjashtimi të pacaktuar nga sanksionet e BE-së, kanë akuzuar Zelenskyn për fshehje të fakteve lidhur me situatën e tubacionit.