Komisioni Xhafaj miraton ndryshimet në ligjin për gjyqtarët

Socialistët i thanë po ndryshimeve në ligjin që lidhet me zgjedhjen e drejtuesve të gjykatave të shkallës së parë dhe apelit. Me ndryshimin e propozuar, fundi i 2028 është përcaktuar si viti i fundit i qëndrimit në detyrë të drejtuesve të këtyre institucioneve.

Me votat e socialistëve pasi demokratët munguan ndryshimet e propozuara në dy ligje të drejtësisë morën miratimin e parë në komisionin e drejtuar nga Fatmir Xhafaj për Nismat Qytetare, Bashkëpunimin dhe Mbikëqyrjen e Institucioneve.

Socialistët nuk u tërhoqën nga propozimi i tyre për të ndryshuar ligjin për “Statusin e gjyqtarëve dhe prokurorëve”.

Sipas tij drejtuesit e gjykatave të shkallës së parë dhe apelit të juridiksionit të përgjithshëm do të qëndrojnë në detyrë deri në fundin e 2028-ës për aq kohë sa nuk është zgjedhur pasardhësi i tyre.

Ky propozim u kundërshtua nga “Unioni i Gjyqtarëve të Shqipërisë”. Ata pretendojnë se ky ndryshim ndërhyn në kompetencat e Këshillit të Lartë Gjyqësor si institucioni i vetëm që përcakton rregullat për zgjedhjen e drejtuesve të rinj të gjykatave.

Olsi Komici, ish anëtar i organeve të “Vettingut”, sot deputet i PS-ës, deklaroi se ndryshimi bëhet për të shmangur vendet bosh që krijohen nga mos zgjedhja në kohë e drejtuesve e rinj të gjykatave të shkallës së parë dhe apelit.

Në përgjigje të “Unionit të Gjyqtarëve Shqiptarë”, Fatmir Xhafaj tha se ndryshimet e propozura janë miratuar edhe nga Komisioni Evropian. Sipas arkitektit të reformës në drejtësi, ato nuk prekin thelbin e ligjeve por përforcojnë mirëfunksionimin e organeve të dala nga reforma në drejtësi.

Ndryshimet e propozuara nga socialistët në dy ligjet e drejtësisë për “Statusin e Gjyqtarëve e Prokurorëve” dhe “ Për organet e qeverisjes së sistemit të drejtësisë” do të kalojnë edhe në filtrin e komisionit të ligjeve të Ulsi Manjës pasi më parë i miratoi Fatmir Xhafaj.