Konflikti Izrael-Hezbollah, Biden: I shqetësuar! Duhet të ndalojmë përshkallëzimin

Presidenti i SHBA Joe Biden tha të dielën se ai është i shqetësuar për tensionet në rritje midis Izraelit dhe grupit libanez Hezbollah në ditët e fundit.

“Po, jam,” u tha Biden gazetarëve kur u pyet nëse ai ishte i shqetësuar për rritjen e tensioneve në Lindjen e Mesme.

“Ne do të bëjmë gjithçka që mundemi që të mos shpërthejë një luftë më e gjerë. Dhe ne ende po punojmë fort,” tha Biden në shtetin e tij të lindjes, Delaware.

Tensionet midis Hezbollahut dhe Izraelit janë rritur pas një sulmi ajror të premten në një periferi jugore të Bejrutit që vrau të paktën 45 njerëz, përfshirë gra dhe fëmijë, dhe plagosi dhjetëra.

Hezbollahu konfirmoi se të paktën 16 nga anëtarët e saj, përfshirë udhëheqësin e lartë Ibrahim Aqil dhe komandantin e lartë Ahmed Wahbi, u vranë në sulmin izraelit.

Sulmi erdhi dy ditë pasi të paktën 37 njerëz u vranë dhe mbi 3,000 të tjerë u plagosën në dy valë shpërthimesh të pajisjeve të komunikimit me valë në të gjithë Libanin.

Ndërsa qeveria libaneze dhe Hezbollahu kanë fajësuar Izraelin për shpërthimet, Tel Avivi nuk e ka mohuar apo konfirmuar përfshirjen e tij.

Hezbollahu dhe Izraeli janë përfshirë në luftë ndërkufitare që nga fillimi i luftës izraelite në Gaza, e cila ka vrarë mbi 41,400 njerëz, kryesisht gra dhe fëmijë, pas një sulmi ndërkufitar nga grupi palestinez Hamas më 7 tetor të vitit të kaluar.

LEXONI GJITHASHTU:

• Bislimi: Raporti i Borrell pritet të rekomandojë heqjen e masave për Kosovën
• “Pse askush nuk vret Biden ose Kamala-n?”, Shtëpia e Bradhë kritikon komentin e Musk