Konstituimi i Kuvendit të Kosovës, Kurti dhe Osmani nuk pranojnë të komentojnë

Presidentja e Kosovës, Vjosa Osmani, duket se nuk ka ndërmend të përzihet më në situatën e krijuar nga partitë politike, të cilat në dy raste dështuan të konstituojnë Kuvendin e ri.

Ajo tha shkurt në kohën kur po bënte homazhe në varrezat e dëshmorëve në Prishtinë, se nuk dëshiron t’i përziej këto çështje. 

 “Ju e dini që e kemi një praktikë që çdo herë kur i përkujtojmë dëshmorët dhe martirët për shkak të nderimit ndaj tyre, nuk përziejmë tema politike me këtë nderim”,-tha Vjosa Osmani.

Nga ana tjetër, asnjë koment nuk e ka dhënë as kryeministri në dorëheqje, Albin Kurti, kur bëri homazhe tek shtatorja e Zahir Pajazitit në sheshin qe mban emrin e këtij te fundit. 

“Seanca është nesër”,-tha Kurti.

Ndërsa, ministri në dorëheqje i Mbrojtjes, Ejup Maqedonci, ka akuzuar partitë opozitare për bllokim, duke shtuar se i kanë numrat. 

 “Patjetër që numrat i kemi. Ne jemi të vetëdijshëm të gjithë që Lëvizja Vetëvendosje është partia fituese dhe nuk është fituese dosido. Opozita duke e parë këtë rrezik për ta e pengoi që dy seanca radhazi konstituimin e Kuvendit që është një goditje ndaj demokracisë”, Ejup Maqedonci – Ministër i Mbrojtjes i dorëhequr.

Të shtunën në orën 12 do mbahet seanca e radhës ku pritet të konstituohet legjislatura e 9 e Kosovës.

Ky proces dështoi dy herë pasi ish-partitë opozitare kërkojnë që Albin Kurti dhe ministrat e tij të japin formalisht dorëheqje. Këto mospajtime kanë bllokuar procesin e konstituimin e kuvendit të ri të Kosovës.