Kontrollet ndaj bizneseve, Inspektorati Shtetëror Shëndetësor vendos 288 masa administrative

Mbi 70 mijë inspektime ka kryer Inspektorati Shtetëror Shëndetësor gjatë periudhës së pandemisë, ndërsa gjatë ditëve të fundit kontrollet janë intensifikuar për shkak të rritjes së numrit të të prekurve.

“Inspektorati Shtetëror Shëndetësor gjatë gjithë kësaj periudhe ka kryer 74 400 inspektime dhe monitorime në të gjitha subjektet. Duke filluar që nga subjektet të cilat merren me tregtimin, prodhimin, shpërndarjen e produkteve ushqimore në të gjitha institucionet publike dhe jo publike. 

Më pas dhe në të gjitha subjektet tregtare”, tha Vjollca Braho, drejtoreshë e Inspektoratit Shtetëror Shëndetësor.

Sipas drejtoreshës së Inspektoratit Shtetëror Shëndetësor ka pasur një ndërgjegjësim që në fillim sa i përket protokolleve që janë të miratuara nga Ministria e Shëndetësisë. Ajo thekson se kujdesi është shtuar nga bizneset gjatë ditëve të fundit, ndërsa ata që kanë shkelur rregullat janë gjobitur.

“Mund të them që në total, që kur ka filluar pandemia, Inspektorati Shtetëror Shëndetësor ka vendosur 288 masa administrative, ndërsa vetëm brenda kësaj jave kemi vendosur 84 masa administrative, ku futen gjobat që i janë vendosur subjekteve për mosrealizim të pjesshëm të protokolleve që janë të miratuara dhe të përcaktuara për t’u realizuar nga ana e tyre, ndërsa 12 subjekteve ua kemi mbyllur aktivitetin pjesërisht ose në mënyrë të plotë”, shtoi znj. Braho.

Drejtoresha e Inspektoratit Shtetëror Shëndetësor shprehet se masa administrative më të larta janë vendosur ndaj supermarketeve, dyqaneve, furrave të bukës, fasonerive dhe ndaj ‘call center-ave’.