Koreja e Jugut ndalon hitin në TikTok që i thurte lavde Kim Jong Un

Koreja e Jugut ka thënë se do të ndalojë një melodi propagandistike virale të Koresë së Veriut që lartëson diktatorin e Phenianit Kim Jong Un si një “baba miqësor” dhe “udhëheqës i madh”.

Rregullatori i medias në Seul tha se videoklipi, i cili është bërë hit në TikTok që nga publikimi i tij në prill, është një shkelje e Aktit të Sigurisë Kombëtare të vendit, shkruan BBC.

“Kënga idealizon Kim Jong Un dhe e lavdëron atë”, tha në një deklaratë të hënën Komisioni i Standardeve të Komunikimit të Koresë së Seulit.

Akti i Sigurisë bllokon aksesin në faqet e internetit dhe mediat e qeverisë së Veriut dhe penalizon sjelljet dhe fjalimet në favor të regjimit.

Njëzet e nëntë versione të videos muzikore Friendly Father do të bllokohen, tha komisioni, por nuk dha detaje se si do të bëhej kjo. Vendimi u nxit nga një kërkesë nga Shërbimi Informativ Kombëtar i Koresë së Jugut, shtoi ai.

“Videoja është një përmbajtje tipike e lidhur me luftën psikologjike kundër Koresë së Jugut, pasi ajo u postua në një kanal që funksionon për t’u lidhur me botën e jashtme dhe është fokusuar kryesisht në idealizimin dhe lavdërimin e njëanshëm të Kim Jong Un”, tha rregullatori.

LEXONI GJITHASHTU:

• Armët në Ukrainë| Koreja e Veriut: SHBA s’mund ta mposhtë kurrë popullin heroik rus
• Koreja e Veriut teston një raketë balistike