“Korrupsion aktiv në zgjedhje”, SPAK çon për gjykim babain e kandidates së PSD-së

Prokuroria e Posaçme Kundër Korrupsionit dhe Krimit të Organizuar ka çuar për gjykim babain e kandidates së PSD-së në Fier, Limorera Bozha, Pandeli Bozhën, për akuzën e korrupsionit aktiv në zgjedhje.

Sipas njoftimit të SPAK, më datë 8 maj, rreth orës 10:00, Pandeli Bozha është takuar me shtetasin V.L. në banesën e këtij të fundit, ku i ka kërkuar mbështetje për vajzën e tij duke i futur në xhep një kartëmonedhë dhe duke i treguar një fletë të ngjashme me atë të votimit, ku ishte sugjeruar kandidati për të cilin duhet të votonte.

“Pas marrjes në pyetje, Vladimir Lushkaj ka dorëzuar pranë oficerëve të policisë gjyqësore kartëmonedhën dhe fletën në fjalë, ku emri i kandidatit për deputet ishte theksuar me ngjyrë portokalli. Të dy materialet janë sekuestruar si prova në kuadër të çështjes penale”, thuhet në njoftimin e SPAK.

Pas arrestimit, Pandeli Bozha është liruar dhe i është caktuar masa e arrestit në shtëpi, për shkak të moshës dhe gjendjes së tij shëndetësore.

Njoftimi i plotë i SPAK

“Prokuroria e Posaçme Kundër Korrupsionit dhe Krimit të Organizuar përfundoi hetimet dhe dërgoi në Gjykatën e Posaçme kërkesën për gjykim të procedimit penal nr.60/1 të vitit 2025, në ngarkim të të pandehurve:

Pandeli Bozha – i akuzuar për veprën penale “Korrupsion aktiv në zgjedhje”, i parashikuar nga nenet 328 i Kodit Penal

Vladimir Lushkaj – i akuzuar për veprën penale të “Korrupsionit pasiv në zgjedhje”, i parashikuar nga neni 328/b i Kodit Penal.

Hetimet për këtë procedim penal janë zhvilluar përmes metodave proaktive.

Gjatë procesit hetimor, nga kqyrja e pamjeve filmike dhe veprimet procedurale të autorizuara nga prokurori është dokumentuar një episod i datës 08.05.2025, rreth orës 10:00, kur shtetasi Pandeli Bozha ka shkuar në banesën e shtetasit Vladimir Lushkaj. Në këtë takim, Pandeli Bozha i ka futur në xhep një kartëmonedhë dhe i ka treguar një fletë të ngjashme me atë të votimit, duke i sugjeruar emrin e kandidatit për të cilin duhet të votonte.

Pas marrjes në pyetje, shtetasi Vladimir Lushkaj ka dorëzuar pranë oficerëve të policisë gjyqësore kartëmonedhën dhe një fletë të ngjashme me atë të votimit, ku emri i kandidatit për deputet ishte theksuar me ngjyrë portokalli. Këto materiale janë sekuestruar si prova në kuadër të këtij procedimi penal.

Nga tërësia e veprimeve hetimore ka rezultuar se veprimet e dokumentuara përmbushin elementë të veprave penale të “Korrupsionit aktiv në zgjedhje” dhe Korrupsion pasiv në zgjedhje”, të parashikuara respektivisht nga nenet 328 dhe 328/b të Kodit Penal”, thuhet në njoftimin e SPAK.

LEXONI GJITHASHTU:

• Arrestimi i babait të kandidates së PSD në Fier, SPAK njoftim zyrtar
• Ekzekutohet urdhri i ndalimit nga SPAK për babain e kandidates së PSD-së në Fier