Kosova miraton projektligjin për themelimin e Agjencisë për Siguri Kibernetike

Qeveria e Kosovës miratoi ditën e djeshme projektligjin për themelimin e Agjencisë për Siguri Kibernetike që synon të luajë rolin kryesor në bashkërendimin e agjencive të ndryshme në këtë fushë.

Kjo agjenci ka për qëllim të përcaktojë parimet për sigurinë kibernetike, përgjegjësitë, detyrat, bashkëpunimin dhe masat për parandalimin e sulmeve kibernetike në Kosovë.

Sipas ekspertëve, Kosova duhet të rrisë bashkërendimin në këtë fushë përtej institucioneve publike, në mënyrë që të parandalohen sulmet e mëdha kibernetike.

Javëve të fundit, qeveria e Kosovës është përballur në periudha të caktuara kohore, me sulme kibernetike por që sipas tyre nuk janë cenuar të dhënat e ruajtura në Qendrën Shtetërore të të Dhënave.

Kryeministri i Kosovës, Albin Kurti u shpreh të mërkurën se siguria kibernetike ishte një nga temat e diskutuara në takimin me kryeministrin e Shqipërisë Edi Rama, gjatë takimit të së martës në Tiranë.

LEXONI GJITHASHTU

• Stoltenberg telefonon Ramën: NATO do mbështesë Shqipërinë kundër sulmeve kibernetike
• ‘Ligësi e neveritshme’, Rama reagon pas akuzave për sulmet kibernetike