Qeveria e Kosovës ka vendosur sanksione ndaj 183 individëve dhe 26 entiteteve të Bjellorusisë, që janë të lidhur me regjimin e presidentit bjellorus Alyaksandr Lukashenkos.
Në sanksione përfshihet ngrirja e aseteve në Republikën e Kosovës, ndalimi i udhëtimit për individët e sanksionuar si dhe ndalimi që individët dhe entitetet në Republikën e Kosovës që të vendosin fonde në mënyrë direkte apo indirekte për individët dhe entitetet e sanksionuara.
Në mbledhjen e ekzekutivit të mbajtur të mërkurën, u tha se Kosova do të zbatojë sanksionet e vendosura nga Këshilli i Bashkimit Evropian.
Zëvendësministrja e Punëve të Jashtme dhe Diasporës në Kosovë, Liza Gashi, tha se të gjitha masat kufizuese janë ndërmarrë në koordinim me Shtetet e Bashkuara, Bashkimin Evropian dhe Kanadanë, raporton REL.
“Duke pasur gjithnjë qëllim promovimin dhe mbrojtjen e paqes, demokracisë dhe të drejtave të njeriut kemi marrë një vendim që do të kontribuonte në vazhdimësi të bashkëpunimit të ngushtë me SHBA-në, BE-në dhe partnerët ndërkombëtarë”, tha gjatë mbledhjes zëvendësministrja për Punë të Jashtme dhe Diasporë, Liza Gashi.
Bashkimi Evropian në dhjetor të vitit të kaluar kishte vendosur pakon e pestë të sanksioneve ndaj individëve dhe entiteteve të lidhura me Lukashenkon.
Lukashenko pretendon se ka fituar zgjedhjet e gushtit të vitit 2020, pretendim që është kundërshtuar nga opozita. Pakënaqësitë rreth manipulimit të rezultatit zgjedhor nxitën protesta masive në Bjellorusi, të cilat u shtypën me forcë nga regjimi i Lukashenkos.
Sanksionet e fundit të BE-së dhe Kosovës po ashtu kanë të bëjnë edhe me nxitjen e një krize me migrantë në kufijtë mes Bjellorusisë dhe shteteve të BE-së në fundin e vitit të kaluar.
LEXONI GJITHASHTU: