Kreu i Agjencisë së Punësimit: 80% e studentëve në shkollat profesionale janë të punësuar

Elira Demiraj, drejtore e Përgjithshme e Agjencisë Kombëtare të Punësimit dhe Aftësive shprehet se gjatë viteve të fundit turizmi ka pasur një hov të madh. Ndërkohë nga ana tjetër përgatitja e personave të aftë kërkon minimalisht 4 vite.

“Ka pasur shumë dinamika, arsimi profesional nuk ka qenë tërheqës për të rinj nisur nga ajo që u ofronte tregu i punës dhe nuk e shikoni veten në perspektivë”, thotë znj. Demiraj.

Në shkollat e arsimimit profesional, duke iu referuar të dhënave të fundit, znj. Demiraj thotë se 80% studentët janë të punësuar.

Por ajo shtoi se ende nevojitet që të ndryshohen paragjykimet e krijuara për turizmin.

“Përgatitja e një force pune kërkon një promovim dhe ndryshim të steriotipeve. Tashmë gjithnjë e më shumë po afrohen mundësi”, shtoi znj. Demiraj.

Drejtorja e Përgjithshme e Agjencisë Kombëtare të Punësimit dhe Aftësive shprehet se shkollat profesionale ofrohen në 8 rajone të vendit. Por znj. Demiraj thotë se Vlora edhe pse një qark me turizëm ka mungesë të studentëve në këtë sektor.

“Vlora është një nga ato rajone ku të rinjtë nuk e zgjedhin arsimin profesional dhe sidomos atë të Hoteleri Turizmit ndërkohë që është një rajon që e kërkon shumë”, deklaroi znj. Demiraj.