Krime lufte në Gaza, HRW: Izraeli, spastrim etnik të qëllimshëm dhe sistematik

Ushtria izraelite është përgjegjëse për zhvendosjen e qëllimshme dhe të detyruar të palestinezëve në Gaza.

Kështu thotë grupi “Human Rights Watch”, që pretendon se ka prova që autoritetet izraelite kanë kryer zhvendosjen e 90 për qind të popullsisë së Gazës, gjë që përbën krim lufte.

Aktivistët flasin për një synim të qartë të qeverisë izraelite, përfshirë kryeministrin Netanyahu, për ta bërë kthimin e palestinezëve në shtëpitë e tyre të pamundur.

“Duke parë këto prova, përfshirë numrin e lartë të civilëve të dëbuar nga tokat e tyre në Gaza, mënyrën e zhvendosjes dhe përpjekjet për ta bërë kthimin e tyre të pamundur mund të themi se zhvendosja është gjerësisht e përhapur, sistematike dhe e qëllimshme, taktika këto që e kthejnë atë në krime kundër njerëzimit. Kjo spikat në zonat ku prania ushtarake është zgjeruar dhe janë krijuar korridore sigurie. Human Rights Watch i konsideron këto veprime të qeverisë së Izraelit një spastrim etnik”, tha Nadia Hardman, nga Human Rights Watch.

Raporti publikohet në një kohë kur shteti hebre vijon fushatën ushtarake në veri të Gazës, e cila ka shkaktuar një valë të re zhvendosjesh të disa qindra mijëra civilëve.

Në dokument, agjencia humanitare ka analizuar urdhrat e Izraelit për evakuim, duke theksuar se ato nuk përputhen me ligjet e luftës dhe nuk garantojnë kalimin e sigurt për palestinezët.

LEXONI GJITHASHTU:

• OKB: Rreth 70 për qind e të vdekurve në Gaza janë gra dhe fëmijë
• OBSH: Mbi 100 pacientë do të evakuohen nga Gaza