Krimea përballet me krizë karburanti dhe energjie, autoritetet ruse pranojnë përkeqësimin e situates

Krimea e pushtuar nga Rusia po përballet me probleme të rënda në furnizimin me energji elektrike dhe karburant, ndërsa autoritetet lokale kanë pranuar se gjendja po bëhet gjithnjë e më e vështirë.

Udhëheqësi i vendosur nga Moska në gadishull, Sergej Aksionov, deklaroi se nuk mund të garantohet furnizimi i përditshëm me benzinë në pikat e karburantit.

“Për momentin nuk mund të garantohet furnizimi i përditshëm me karburant”, tha Aksionov, duke shtuar se autoritetet po përpiqen të menaxhojnë krizën.

Probleme serioze janë raportuar edhe me energjinë elektrike. Sipas tij, aktualisht nuk është e mundur të hartohet një plan që do të siguronte shpërndarje të barabartë të energjisë në të gjithë territorin e Krimesë.

Mungesat e karburantit dhe ndërprerjet e energjisë kanë ngritur shqetësime për ndikimin e tyre në shërbimet bazë, furnizimin me ushqime dhe jetën e përditshme të banorëve.

Situata lidhet me zhvillimet e luftës në Ukrainë, përfshirë sulmet ndaj infrastrukturës energjetike dhe logjistike nën kontrollin rus. Autoritetet në Krime nuk kanë dhënë një afat se kur pritet normalizimi i furnizimeve.