Krimi i organizuar sulmoi policinë e Kosovës, thotë Haradinaj

Ish-kryeministri i Kosovës, njëkohësisht kryetari i AAK-së, Ramush Haradinaj ka reaguar në lidhje me sulmin e ndodhur mëngjesin e sotëm ndaj policisë në veri të vendit.

Përmes një postimi në rrjetet sociale, Haradinaj u shpreh se sulmi është kryer nga krimi i organizuar dhe akte kriminale të tilla janë alarm për Kosovën.

Haradinaj bën thirrje për distancim nga dhuna dhe krimi.

“Krimi i organizuar ka sulmuar Policinë e Kosovës. Këto akte kriminale janë alarm për të gjithë.  Krimi i organizuar nuk ka përkatësi politike as etnike. Ai i rrezikon të gjithë qytetarët, pavarësisht përkatësisë etnike, andaj është në interesin e secilit individ dhe komunitet që ta denoncojë e ta luftojë krimin. Të distancohemi nga dhuna e nga krimi e të bashkohemi në luftën e pakompromis ndaj tij”, tha Haradinaj.

Mëngjesin e sotëm rreth orës 07:40, punonjës të policisë së Kosovës u sulmuan me granatë dore dhe kallash, në momentin kur ishin duke realizuar ndërrimin në pikat kufitare.

Ministri i Punëve të Brendshme Xhelal Sveçla, bëri me dije gjatë një konference për mediat, se ky është sulmi i katërt në pak ditë ndaj Policisë së Kosovës.

LEXONI GJITHASHTU

• Sulmohet me granatë dore dhe kallash policia në veri të Kosovës
• Sveçla: Qëllimi i Serbisë është ta destabilizojë Kosovën