Ngacmimet seksuale në sport nuk janë një temë që diskutohet shumë në botën e kinemasë, dhe “Slalom”, filmi i pare i regjisores franceze Sharlin Favier, është një kontribut i vyer për diskutimin e kësaj çështjeje. Autobiografia e një sportisteje të re, e cila vihet nën kontrollin e trajnerit të saj, i cili mundohet ta kontrollojë mendërisht dhe fizikisht.

Frederik Ponsard intervistoi për Euronews regjisoren pak përpara premierës së filmit.

“Ky film bazohet mbi idenë e raporteve midis sportistëve dhe trajnerëve, që unë doja ta trajtoja në të gjithë prizmat, me të gjithë kontradiktat, pa zbukuruar gjë. Në moshën 15 vjeçare shumë sportistë nuk e dine çfarë duan, por sigurisht ata dine se çfarë nuk duan. Ky film trajton pikërisht marrëdhënien toksike midis një sportisteje adoleshente dhe trajnerit të saj,” – tha regjisorja Favier.

Filmi u përzgjodh për çmim në Festivalin e Kanës për edicionin e vitit 2020, i cili për shkak të pandemisë nuk u zhvillua.

Filmi u xhirua në tetë vite, dhe regjisorja shprehet se nuk është një thirrje për të abuzuarit por një tentative për të na bërë ta shohim jetën nga perspektiva e një adoleshenteje pa eksperiencë.

“Doja që ky film të ishte një udhëtim emocional, pasi besoj se kjo është një mënyrë e mire për të përfshirë shikuesin në histori, nuk doja që të ishte një debat analitik, apo që të gjykoheshin personazhet në film,” – thotë Favier.

“Doja që secili prej shikuesve të ngrejë pyetjen në fund të filmit: Çfarë ndodhi? Në mënyrë që debati ti nxisë njerëzit të flasin haptazi, pak a shumë kjo është ideja e këtij filmi,” – shton ajo më tej.

Filmi është prezantuar në disa festivale filmash dhe është pritur mire nga kritikët, teksa gjatë këtij viti ai do të debutojë në kinematë e Evropës, sapo të rihapen kinematë.