Bashkëpunëtorët e liderit të opozitës ruse të burgosur, Alexei Navalny, thanë të hënën se ai ishte vendosur në një koloni burgu mbi Rrethin Arktik, gati tre javë pasi kontakti me të kishte humbur.

Sipas mediave të huaja, Navalny, kundërshtari më i shquar i presidentit rus Vladimir Putin, po vuan një dënim 19-vjeçar me akuzën e ekstremizmit. Ai ishte burgosur në rajonin Vladimir të Rusisë qendrore, rreth 230 kilometra (140 milje) në lindje të Moskës, por avokatët e tij thanë se nuk kishin mundur ta takonin atë që nga 6 dhjetori.

Zëdhënësja e tij, Kira Yarmysh, tha se ai ndodhej në një koloni burgu në qytetin Kharp, në rajonin Yamalo-Nenets rreth 1,900 kilometra (1,200 milje) në verilindje të Moskës.

Navalny është “mirë” dhe një avokat e vizitoi atë, tha Yarmysh për Associated Press.

Rajoni është i njohur për dimër të gjatë dhe të ashpër. Qyteti është rreth 100 kilometra (60 milje) nga Vorkuta, minierat e qymyrit të së cilës ishin ndër më të ashprat e sistemit sovjetik të kampeve të burgjeve Gulag.

“Është pothuajse e pamundur të arrish në këtë koloni; është pothuajse e pamundur të dërgosh letra atje. Ky është niveli më i lartë i mundshëm i izolimit nga bota,” tha kryestrategu i Navalny, Leonid Volkov, në rrjetin social “X”.

LEXONI GJITHASHTU:

• “Zhduket” kundërshtari i Putinit, ndërkombëtarët të shqetësuar për fatin e Navalnyt
• Navalny dërgohet në një burg të ri, nuk dihet vendndodhja e tij