Kriza ekonomike post-pandemi mund të zgjasë mbi 2 vite, thotë Erina Gjoka

Ekspertët gjermanë të financave parashikojnë që kriza ekonomike e diktuar nga pandemia e Covid-19 do të zgjasë mbi 2 vite.

Fondi Monetar Ndërkombëtar deklaroi të martën se bota është përballë skenarëve të mundshme të një krize të ngjashme me atë të Depresionit të Madh në vitet ’30.

Erina Gjoka, menaxhere referente në departamentin ligjor të bankës gjermane në Frankfurt, u shpreh në një intervistë për Ilva Taren në Euronews, se situata aktuale krijon përshtypje të tillë, por ajo e krahasoi gjendjen me atë të viteve 2008-09, apo të fillimviteve 2000 pas rrëzimit të kullave binjake në SHBA.

“Situata krahasohet jo vetëm me krizën e viteve ’30, por edhe me krizën që përfshiu Amerikën dhe Evropën në vitet 2008-09. Krijohet përshtypja se do jetë shumë e ngjashme. Me formulat që ne kemi në dorë për momentin, kriza përllogaritet të zgjasë mbi 2 vjet” – tha Erina Gjoka, e cila shtoi se në dy vitet e ardhshme mund të kemi të njëjtat vështirësi që po hasim sot, por mbase me intensitete më të vogla.

Gjoka foli për ndihmën ekonomike prej 750 miliardë eurosh që Banka Qendrore e Evropës garantoi për Gjermaninë. Ajo pohoi se është ende herët të thuhet nëse kjo shumë do të mjaftojë apo jo, por theksoi se ishte një dritë jeshile për ekonominë.

Frankfurti, konsideruar si motori ekonomik i Gjermanisë, i mori masat kufizuese 2 javë më vonë se qytetet e tjera.

Gjoka shpjegoi se masat parandaluese u vendosën në mes të muajit mars dhe vendimi u vonua për të mos ngadalësuar ritmet e ekonomisë.

Përballë krizës ekonomike po mendohet si zgjidhje blerja e huave apo eurobondeve, dhënia e kredive nga bankat e nivelit të dytë dhe rishikimi i të gjitha marrëveshjeve ekonomike.