Kriza politike në Bullgari, qytetarët votojnë në zgjedhjet e pesta brenda dy viteve

Këtë të diel në Bullgari zhvillohen zgjedhjet parlamentare, të pestat në më pak se dy vite.

Vendi vijon të jetë në krizë politike.

Qytetarët u drejtohen kutive të  votimit sepse asnjë nga partitë politike nuk  ka arritur të krijojë një qeveri të qëndrueshme.

Sipas sondazheve gara është e ngushtë mes partisë Gerb të kryeministrisë Bojko Borisov dhe partisë “Ne Vazhdojmë Ndryshimin”, drejtuar nga ish-kryeministri Kiril Petkov.

Këtë herë Partia e Petkov ka krijuar një aleancë me një parti të vogël të qendrës së djathtë e quajtur Bullgaria Demokratike.

Sikundër në zgjedhjet e mëparshme, korrupsioni dhe inflacioni kanë qenë temat kryesore.

Bullgaria është shteti më i varfër në Bashkimin Europian. Është anëtare e NATOS por ka edhe lidhje të forta historike dhe kulturore  me Rusinë.

Nga fundi i vitit 2022, parlamenti bullgar miratoi paketën e parë të ndihmës ushtarake për Ukrainën, por presidenti Rumen Radev njoftoi se Bullgaria nuk do të dërgonte armë në Kiev pa një kabinet të qëndrueshëm në pushtet.

Pro-rusi Radev, ka emëruar kabinete të përkohshme dhe e ka kritikuar Petkovin dhe aleatët e tij si “luftënxitës”.

Sondazhet e fundit sugjerojnë se shanset për një fund të menjëhershëm të ngërçit politik janë të ulëta. Deri në shtatë grupe mund të arrijnë pragun 4% për të hyrë në një parlament të fragmentuar ku partitë populiste dhe pro-ruse ka të ngjarë të rrisin përfaqësimin e tyre dhe të promovojnë politikë radikale dhe anti-BE.

LEXONI GJITHASHTU:

• Tragjedi në Bullgari, gjenden 18 emigrantë të pajetë në një kamion të braktisur
• Bullgari | 5 zgjedhje në 1 vit e gjysmë, elektorati i përçarë nga lufta në Ukrainë