Krizë humanitare në Kherson, banorët pa elektricitet dhe ujë të pijshëm

Tre javë nga shkatërrimi i digës në Kakhovka, jeta mbetet e mjerueshme për njerëzit në rajonin e Khersonit.

Përmbytjet biblike shkaktuan një katastrofë humanitare dhe ambientale. Disa nga mijëra personat të detyruar të braktisnin shtëpitë janë kthyer, por nuk kanë elektricitet dhe as ujë të pijshëm.

“Për momentin dushi nuk funksionon, nuk ka elektricitet. Po e ngrohim ujin dhe po pastrohemi. Çfarë mund të bëjmë tjetër? Elektriciteti nuk do të rikthehet së shpejti, pasi riparimet nisin vetëm këtë javë”.

I dërguari i Papës në Ukrainë ka parë nga afër vështirësitë. Vatikani ka hapur një mensë në qytetin e Khersonit, për t’u ardhur në ndihmë banorëve.

“Ajo që nuk shkatërruan bombardimet dhe nga rusët, që plaçkitën shtëpitë e qytetarëve, u shkatërrua nga uji pas hedhjes në erë të digës”- tha Kardinal Konrad Krajewski, i dërguari i Papës.

Diga u shkatërrua më 6 qershor nga një akt sabotazhi që Ukraina dhe Perëndimi ia atribuojnë rusëve. Autoritetet ukrainase vlerësojnë se rreth 10 mijë hektarë tokë e mbjellë mbeten nën ujë dhe se pasojat do të zgjasin për dekada.

LEXONI GJITHASHTU: 

• Rama: Lajm i mirë! Kosova të dëshmojnë se rajoni i përket procesit të Berlinit
• E rëndë në Pogradec, një 44-vjeçar gjendet pa jetë në liqen, detajet e para