Krizë urie në Gaza, Blinken: E gjithë popullsia në situatë akute, rrezikon vdekjen

Sekretari amerikan i Shtetit, Antony Blinken ka deklaruar se e tërë popullsia prej 2 milionë banorësh në Gaza po përjeton një pasiguri akute ushqimore.

Blinken ka theksuar se bëhet fjalë për herën e parë që një popullsi klasifikohet në këtë nivel dhe i ka bërë thirrje Izraelit që të kthejë në prioritet shpërndarjen e ndihmave për kategoritë në nevojë.

Edhe agjencitë e OKB-së kanë deklaruar se veriu i Gazës mund të përballet me një krizë urie në muajin maj, nëse nuk arrihet një armëpushim.

Sa i takon deklaratës së Blinken, ajo erdhi gjatë një vizite në Filipine, pas të cilës ai do të udhëtojë drejt Lindjes së Mesme, në vizitën e tij të gjashtë në rajon që prej tetorit, teksa përpjekjet për një armëpushim vazhdojnë.

Komentet e shefit të diplomacisë amerikane janë ndër më të fortat të bëra prej tij lidhur me situatën humanitare në Gaza.

“Sipas përllogaritjeve më të sakta, 100 për qind e popullsisë në Gaza ndodhet në një situatë akute pasigurie ushqimore. Kjo është hera e parë që një popullsi klasifikohet si e tillë”, deklaroi Blinken.

Pasiguria akute ushqimore është kur pamundësia e një personi për t’u ushqyer në mënyrë të përshtatshme vë në rrezik imediat jetën e tij. Nëse kjo situatë nuk zgjidhet, atëherë ajo çon njerëzit drejt vdekjes nga uria.

LEXONI GJITHASHTU:

• Netanyahu: Nuk do përkulem para presionit ndërkombëtar për të ndalur luftën në Gaza
• Bilanci i luftës në Gaza, shkon në mbi 31,600 numri i të vdekurve