Kryeministri kroat takohet me Zelenskin në Kiev

Kryeministri kroat, Andrej Plenkoviç ka arritur në Kiev për të zhvilluar bisedime me presidentin ukrainas, Volodimir Zelenski.

Në këtë takim, Zelenski do bisedojë me kryeministrin kroat për ndihmën e mëtejshme dhe vazhdimin e rrugës evropiane të Ukrainës.

Qeveria kroate ka publikuar imazhe teksa Plenkoviç shihet duke u takuar me presidentin ukrainas, Zelenski.

Kryeministri shoqërohej nga ministri i Punëve të Jashtme dhe Europiane, Gordan Grliç Radman dhe Zvonimir Frka-Peteshiç, shef i kabinetit të kryeministrit.

Qeveria kroate ka deklaruar se ata e dinë shumë mirë ndjesinë se si është të jesh nën agresionin ushtarak.

Ata thanë se do i ofrojnë mbështetje politike, diplomatike, financiare dhe humanitare, si dhe ndihmë për t’u kujdesur për refugjatët ukrainas.

Sipas një deklarate zyrtare të qeverisë kroate, vizita e kryeministrit në Ukrainë po zhvillohet në prag të Ditës së Europës dhe është një shprehje solidariteti dhe mbështetjeje për autoritetet e popullin ukrainas, të cilët janë viktima të agresionit brutal rus.

Para pushtimit ushtarak, kryeministri kroat bëri një vizitë zyrtare në Ukrainë në dhjetor të vitit 2021 dhe mori pjesë në një samit të Platformës së Krimesë me liderët e BE-së në muajin gusht të 2021.