Kryeministri lituanez nën hetim nga Komiteti i Etikës

Kryeministri i Lituanisë, Gintautas Paluckas, po përballet me hetim për një konflikt të mundshëm interesi, pasi një kompani ku ai është bashkëpronar – “Garnis”, që operon në industrinë e prodhimit të baterive – mori një kredi të subvencionuar prej 200,000 eurosh nga banka shtetërore e zhvillimit ILTE, ndërsa ai ishte në detyrë.

Paluckas ka mohuar çdo përfshirje në vendimmarrje, duke deklaruar se nuk ka marrë pjesë në aktivitetet e kompanisë dhe nuk ka ndikuar në procesin e dhënies së kredisë. Ai ka kërkuar vetë një vlerësim nga Komisioni Kryesor për Etikën Zyrtare.

Kreu i këtij komisioni, Gediminas Sakalauskas, bëri të ditur se hetimi do të përqendrohet në sjelljen e Kryeministrit gjatë mbledhjeve qeveritare ku është diskutuar për ILTE-në, për të vlerësuar nëse ka pasur ndonjë shkelje ligjore. Hetimi pritet të zgjasë deri në tre muaj.

Megjithë thirrjet për dorëheqje nga opozita, Paluckas ka deklaruar se nuk ka ndërmend të japë dorëheqjen, duke i cilësuar pretendimet si “të sajuara nga hiçi”.

LEXONI GJITHASHTU:

• PE miraton raportin për Shqipërinë: Zgjedhjet konkurruese, por u përdor shteti
• Komisioni Evropian i jep dritën jeshile Bullgarisë për euron