Kthimi i “djalit plëngprishës” të mbretit trazon Tajlandën

Këtë javë njerëzit në Tajlandë janë shpërqendruar nga grindjet e pafundme për të formuar një qeveri të re nga ardhja e papritur, nga SHBA, e një avokati tajlandez 42-vjeçar me pamje gazmore, që viziton për herë të parë në 27 vjet vendin e lindjes.

Vacharaesorn Vivacharawongse është i dyti nga katër djemtë e larguar të mbretit Vajiralongkorn. Deri më tani besohej gjerësisht se atyre u ishte hequr statusi i tyre mbretëror dhe se nuk kishin vend në linjën e trashëgimisë së fronit.

Por trashëgimia u bë problematike pasi vajza e madhe e mbretit, Princesha Bajrakitiyabha, trashëgimtarja më e besueshme, u sëmur dhjetorin e kaluar. Ajo është ende në koma dhe duket se nuk ka gjasa të shërohet.

Për vite me radhë në Tajlandë flitet në heshtje për mundësinë e rehabilitimit dhe kthimit të njërit prej djemve të huaj për të luajtur një rol mbretëror.

Sipas BBC, vizita e paparalajmëruar e zotit Vacharaesorn mund të jetë fillimi i një rehabilitimi të tillë, megjithëse nuk ka pasur asnjë deklaratë zyrtare nga pallati.

Ai është një nga pesë fëmijët e lindur nga gruaja e dytë e mbretit Vajiralongkorn, Sujiranee, një ish-aktore me të cilën ai u divorcua në vitin 1996.

Vacharaesorn dhe tre vëllezërit e tij, të cilët ishin në shkollë në MB në atë kohë, në fakt u dëbuan nga Tajlanda me nënën e tyre dhe që atëherë kanë jetuar në SHBA. Motra e tij, Princesha Sirivanavari u kthye në Tajlandë për të jetuar me babanë e saj.

Në të kaluarën, katër djemtë publikonin herë pas here letra duke apeluar për pajtim me babanë e tyre dhe për t’u lejuar të ktheheshin në Tajlandë, pa efekt.

Vacharaesorn i ka kaluar tre ditët e para në Bangkok pjesërisht si turist, duke rizbuluar qytetin, duke vizituar tempuj, duke shijuar ushqimin tajlandez dhe duke hipur në një tuk-tuk. Ai u tha gazetarëve që të kthehej ishte si një ëndërr e realizuar për të.

Deri më tani ende nuk duhet nëse djali plangprishës i mbretit do të jetë trashëgimtar i postit mbretëror.

LEXONI GJITHASHTU:

• Konkurrentet e Miss Universe Indonezia akuzojnë organizatorët për abuzim seksual
• Osmani kërkon ndihmën e SHBA-së për përshpejtimin e anëtarësimit të Kosovës në NATO