Kualifikueset e “Katar 2022”, Polonia pa Lewandowskin ndaj Anglisë

Futbollisti kryesor i përfaqësueses polake të futbollit, Robert Lewandowski do të mungojë në përballjen e 31 marsit kundër Anglisë.

Sulmuesi vuajti një lëndim gjatë fitores 3-0 që Polonia arriti ndaj Andorrës të dielën.

Shtatlarti, i cili aktivizohet me Bayern Munich, realizoi dy gola në këtë fitore, mirëpo doli nga fusha duke çaluar.

Federata Polake e Futbollit njoftoi se Lewandowski ka pësuar një lëndim në ligamente dhe do të qëndrojë të paktën 10 ditë jashtë fushe.

Polonia dhe Anglia ndodhen në një grup me Shqipërinë në kualifikueset e botërorit Katar 2022.

Shqipëria, e cila u mund 2-0 nga Anglia të dielën, pritet të ndeshet me Poloninë më 2 shtator, ndërsa më 31 mars në kalendar ka ndeshjen me San Marinon.