Kufizimi i muzikës në verë, operatorët e Durrësit: Nuk na cënohet puna

Vendimi për kufizimin e muzikës pas orës 12 të natës është ende i paqartë për një pjesë të operatorëve turistikë në Durrës.

Menaxherë dhe pronarë lokalesh, ku mbrëmjeve ka muzikë live, thonë jashtë kamerave se janë në pritje të përcaktimit nga ana e bashkisë, se cilat do të jenë zonat ku nuk do të lejohet asnjë aktivitet me zë të lartë pas orës 12 të natës.

Sa i përket strukturave hoteliere, ky është një vendim që nuk do t’ua cenojë punën gjatë sezonit veror.

 “Ky lajm nuk na prish punë, sepse fashat orare të vendosura janë brenda normave. Ne edhe gjatë kohës që nuk ishin këto kufizime, në 11 të darkës e mbyllnim muzikën, sepse në hotel ke të ftuar tipe të ndryshme klientësh, ke mosha të ndryshme, kështu që duhet t’i përshtatemi nga pak të gjithëve,” – tregoi Blerim Norja, operator turistik.

Ndërsa kanë kontaktin e parë me pushuesit, Norja thotë se ky vendim do të japë rezultate pozitive.

 “Besoj që është një nismë pozitive dhe në ‘feedback’-un total do jetë pozitiv, sepse do krijojë një lloj kënaqësie dhe për ata turistë që nuk e durojnë zhurmën, muzikën. Pra, ne duhet të gjejmë një balancë që u përshtatet të gjithëve,” – u shpreh ai.

Durrësi këtë vit pritet ta çelë më herët sezonin e rërës dhe detit, prandaj edhe rezultatet e para pritet t’i shohim që në maj.

Ndërsa qyteti bregdetar do të presë pushuesit e parë do të kuptojmë, nëse ky vendim i ri, që lidhet me rendin dhe qetësinë në zonat e pushimit, do të japë frytet e pritshme.

LEXONI GJITHASHTU:

• Revoltohet Rama: Do të vriteshin serbët se nuk erdhën për turizëm në Kosovë
• Ky rajon i njohur italian po vendos kufizime për turistët