Emigrantët, sondazhi i Euronews, 51% e banorëve kundër politikave të BE

Sipas një sondazhi të kompanisë IPSOS për llogari të Euronews, 59% e të pyeturve thonë se emigracioni ilegal është prioriteti numër një.

Fenomeni është renditur i katërti mes çështjeve kryesore, me tre të parat që dominohen nga shqetësimet ekonomike.

Për ata që u përgjigjën, emigracioni ishte më i rëndësishëm se ndryshimet e klimës, mbrojtja, apo të drejtat e pakicave.

Sipas Andrew Geddes, drejtor i Qendrës për Politikat Migratore, këto perceptime janë ushqyer nga numri në rritje i emigrantëve që mbërrijnë në Evropë.

“Në 2015-n, ne konstatuam një shqetësim publik serioz, që më pas ra ndjeshëm gjatë pandemisë. Tani po e shohim të rritet sërish. Ndaj mendoj se këto perceptime janë aspekte të rëndësishme dhe aktuale. Por ky perceptim subjektiv bën që çështja të spikasë”, thotë Andrew Geddes, drejtor i Qendrës për Politikat Migratore.

Holanda, Gjermania dhe Portugalia janë vendet ku shumica e njerëzve mendojnë se lufta ndaj emigracionit ilegal duhet të jetë prioritet; prandaj dhe partitë ekstremiste janë në rritje.

“Wilders në Holandë, Alternativa për Gjermaninë në Gjermani dhe Çega në Portugali. Janë parti politike që kanë politizuar çështjen e emigracionit dhe unë mendoj se po kontribuojnë në rritjen e shqetësimit publik”, shprehet Geddes.

Në të njëjtën kohë, politika e BE-së mbi çështjen kritikohet ashpër. 51% e të pyeturve e konsiderojnë atë negative dhe vetëm 16% pozitive. 71% e qytetarëve të Unionit besojnë se blloku duhet të forcojë kontrollet kufitare, ndërsa vetëm 28% janë në favor të një politike mikpritëse për emigrantët.

“Mendoj se në thelb, çështja prek njerëzit që duan të shohin një sistem funksional dhe që shtetet anëtare të bien dakord me njëra-tjetrën. Por në vend të kësaj ajo çka shohin janë shtetet anëtare që përplasen për politikat që duhet të zgjidhen. Pra, debate të vazhdueshme për emigracionin”, thotë ai.

Sipas ekspertit, debati për emigracionin do të udhëheqë fushatën elektorale në nivel evropian dhe mundet gjithashtu të nxisë rritjen e forcave radikale të djathta.

LEXONI GJITHASHTU:

• Pezullohet zbatimi i ligjit për emigrantët në Teksas
• A duhet të votojnë emigrantët, a e njohin Shqipërinë? Çfarë mendimi kanë qytetarët