Kuqezinjtë përgatiten për San Marinon, Kumbulla dhe Çekiçi besojnë te vendi i dytë

Kombëtarja e Shqipërisë e ka lënë pas suksesin me Hungarinë, duke menduar për ndeshjen e ardhshme të kualifikueseve për kampionatin botëror.

Kuqezinjtë do të ndeshen të mërkurën në “Elbasan Arena” me San Marinon dhe për mbrojtësin e Kombëtares Marash Kumbulla, objektivi për vendin e dytë mbetet i arritshëm nëse gjërat do bëhen siç duhet duke nisur nga takimi i ardhshëm.

“Dëshira jonë është të shkojmë në “play off”, por është e vështirë pasi kemi përballë ekipe të forta. Ne do provojmë të fitojmë çdo ndeshje e do japim maksimumin dhe uroj që të arrijmë objektivat,” – u shpreh futbollisti.  

Për mesfushorin Endri Çekiçi rëndësi ka që të merret maksimumi i pikëve, duke e kaluar në plan të dytë mundësinë për të arritur një fitore bindëse, pavarësisht se përballë do jetë një kundërshtar në letër më inferior.

 “Kemi ndryshuar pak stilin e lojës dhe besoj se dhe ndaj San Marinos do hymë që në fillim për të shënuar. Rendësi ka të marrim tre pikët, më pas nëse do të shënojmë goleadë do ishte ekstra për ne,” – tha Çekiçi.

Të mërkurën në fushën e lojës do të zbresë dhe Kosova, që do të ndeshet me Spanjën, një prej kundërshtarëve më të fortë në grup. Pas barazimit 1-1 me Greqinë, skuadra e Challandes do masë forcat me iberikët në stadiumin “Fadil Vokrri”.

LEXONI GJITHASHTU: 

• Portieri Etrit Berisha kërkon maksimumin nga shokët e skuadrës
• Shqipëria mund Hungarinë, Broja heroi i ndeshjes në “Elbasan Arena”
• Ish-futbollisti tregon pikat e ‘dobëta’ të Kombëtares së Shqipërisë