Kurti dhe Osmani nisin punë për formimin e qeverisë dhe zgjedhjen e Presidentit të ri

Ushtruesja e detyrës së presidentes, Vjosa Osmani dhe kryetari i Lëvizjes Vetëvendosje, Albin Kurti u kanë dërguar një letër subjekteve politike parlamentare me qëllim të konsultimit për konstituimin sa më të shpejtë të institucioneve të reja të dala pas zgjedhjeve të 14 shkurtit.

Letrat u janë dërguar PDK-së, LDK-së, AAK-së dhe subjekteve politike nga komunitetet për takime të ndara më datën 15 mars. Në letrën dërguar ushtruesit të detyrës së kryetarit të PDK-së Enver Hoxhaj, takimi konsultativ me këtë parti propozohet të mbahet në ora 11:00, ndërsa në letrën dërguar LDK-së propozohet që takimi në ora 12:30, ndërsa takimi me liderin e AAK-së Ramush Haradinaj në ora 13:30.

Nga ana tjetër, Vetëvendosje ka hedhur hapin e parë zyrtar në drejtim të negociatave për emrin e presidentit. Me anë të një letre, Albin Kurti i ka shprehur ofertën e bashkëpunimit Lidhjes Demokratike të Kosovës, e cila edhe për pak ditë do të jetë nën drejtim e Isa Mustafës.

Mësohet se në përgjigjen e kthyer nga kryetari aktual Mustafa, negociata për emrin e presidentit, do të hapen pasi Lidhja Demokratike e Kosovës, të ketë përcaktuar kryetarin dhe strukturat e reja, zgjedhje të cilat do të bëhen më 14 mars.