Kurti fton opozitën në takim për presidentin, i përgjigjet Osmanit për datën e zgjedhjeve

Kryeministri i Kosovës, Albin Kurti ka thënë se që sot do ‘t’i dërgojë ftesat tek liderët e partive opozitare për t’u takuar në fillim të javës së ardhshme.

Kështu deklaroi Kurti në një prononcim për media teksa u pyet për çështjen e presidentit, pas vizitës në QKUK, raporton KosovaPress.

“Duhet të takohemi dhe unë qysh sot do t’i dërgoj ftesat për t’u takuar në fillim të javës së ardhshme”, tha ai.

Kurti i është përgjigjur deklaratës së presidentes, Vjosa Osmani sa i përket caktimit të datës së zgjedhjeve më 28 dhjetor.

I pyetur nga KosovaPress lidhur me këtë çështje, ai tha se nuk ka qenë e mundur që të mbahen më 21 dhjetor e as më 4 janar.

“Zgjedhjet e fundit janë mbajtur më 28 dhjetor, për bindjen time të fuqishme zgjedhjet nuk ka qenë e mundur të mbahen më 21 dhjetor për shkak se ekziston edhe shkresa nga sekretariati i KQZ-së, që thotë se kanë të pamundur organizimin e zgjedhjeve për 21 dhjetor për të përmbushur afatet e domosdoshme kohore lidhur me sfidat teknike e logjistike. Mos harroni që ne kishim në tetor dhe nëntor edhe dy raunde të zgjedhjeve lokale dhe hymë në procesin e zgjedhjeve të parakohshme parlamentare ende pa u bërë certifikimi i zgjedhjeve lokale. Prandaj, nuk ka pasur mundësi tjetër për datë përveçse më 28 dhjetor. Nëse ndokush do të mendonte se ka qenë e mundur të organizohen zgjedhjet më 4 janar, as kjo s’ka qenë e mundur për shkak të aspektit buxhetor”, tha ai pas vizitës në QKUK.