Kurti fton vendet e rajonit për të nxjerrë para drejtësisë përgjegjësit e gjenocidit të Srebrenicës

Kryeministri i Kosovës, Albin Kurti ka ftuar të gjitha vendet e rajonit të bëjnë përpjekjet e duhura për t’i nxjerrë para drejtësisë të gjithë ata që janë përgjegjës për gjenocidin në Srebrenicë.

Kreu i qeverisë së Kosovës iu referua rezolutës së miratuar nga Parlamenti që dënon gjenocidin në Srebrenicë dhe theksoi se paqja në Ballkan arrihet vetëm nëse ndëshkohen kriminelet.

“Është e pamendueshme se si edhe në shekullin 21, ka politikanë në rajonin tonë, që thonë se ata që kërkojnë ndëshkimin e fajtorëve për gjenocid qenkan kundër dialogut e kundër fqinjësisë së mirë”, tha Kurti.

“Përkundrazi, e vetmja fqinjësi e mirë zhvillohet duke dënuar krimet e vendosur drejtësi dhe i vetmi dialog i mirë ndodh kur palët nuk tremben nga distancimi prej krimeve”, shtoi Kurti.

Sot shënohet 26-vjetori i masakrës së Srebrenicës.

Më 11 korrik të vitit 1995, mbi 8,000 burra dhe djem boshnjakë u vranë disa ditë pasi forcat serbe të Bosnjës pushtuan Srebrenicën.

Masakra e Srebrenicës është episodi i vetëm i luftës në Bosnjë që përcaktohet si një gjenocid, përfshirë nga dy gjykata të Kombeve të Bashkuara.

LEXONI GJITHASHTU:

• 26 vite nga masakra e Srebrenicës, eshtrat e 19 viktimave varrosen në Qendrën Përkujtimore
• “Srebrenica” përshkallëzon krizën politike në Malin e Zi
• Mohoi gjenocidin në Srebrenicë, shkarkohet ministri i Drejtësisë në Mal të Zi