Kurti takon Lajçak: Serbia ka 2 javë kohë për targat

Në kuadër të Forumit Ekonomik të Delfit, Kryeministri i Kosovës, Albin Kurti zhvilloi takim me Përfaqësuesin Special të Bashkimit Evropian për Dialogun Kosovë-Serbi, Miroslav Lajçak.

Në takim u bisedua për mbarëvajtjen e procesit të dialogut ndërmjet Kosovës dhe Serbisë, si dhe hapat e ardhshëm në këtë proces.

Kryeministri theksoi se Qeveria e Kosovës është e angazhuar për dialog parimor e të balancuar.

Ai ritheksoi se nga ky dialog duhet të përfitojnë qytetarët e të dyja vendeve, nëpërmjet një marrëveshjeje të qëndrueshme dhe të zbatueshme, që në qendër ka njohjen reciproke.

U bisedua edhe për çështjen e targave të automjeteve midis Kosovës dhe Serbisë.

Kryeministri veçoi faktin se jemi dy javë larg afatit për marrëveshje për këtë çështje, bazuar në standardet dhe praktikat aktuale më të mira të Bashkimit Evropian.

Delegacionet e Serbisë dhe Kosovës kanë mbajtur deri tani 7 takime por ende nuk kanë gjetur marrëveshje për çështjen e targave.

Në bazë të marrëveshjes së arritur në Bruksel mes Kosovës dhe Serbisë, nga 4 tetori i vitit 2021 ka nisur së zbatuari përkohësisht regjimi i letrave ngjitëse në vend të heqjes së targave të makinave të regjistruara në Kosovë dhe Serbi.

Kjo masë është parashikuar të zgjasë gjashtë muaj deri në gjetjen e një zgjidhjeje të përhershme.