Sot në Ministrinë e Arsimit dhe Sportit u zhvillua një takim me përfaqësues të universiteteve, për të diskutuar rreth hapjes së programeve të formimit të vazhduar në fushën psiko-pedagogjike.

Ministria e Arsimit, së bashku me fakultetet që kanë programe studimi në fushën e arsimit, ngritën një grup të përbashkët pune për të hartuar bazat e programeve në fushën psiko-pedagogjike, bazuar në kriteret e përcaktuara që i hapin rrugën diplomave të njëvlershme, të ngjashme ose të përafërta me fushën e mësimdhënies në arsimin parauniversitar.

Pas këtij procesi, ministria do të bëjë vlerësimin dhe miratimin e programeve të përshtatshme dhe brenda vitit të ardhshëm akademik këto programe do të hapen, duke u dhënë këtë mundësi të gjithë të interesuarve.

Pak ditë më parë u miratua udhëzimi i ri, i cili mundëson që profesionin e mësuesit ta ushtrojnë edhe profesionistë të diplomuar në dy cikle, Bachelor dhe Master, në fusha të ndryshme.

Bëhet fjalë për fusha si Gjuhë Shqipe-Letërsi, Gjuhë e Huaj, Matematikë, Biologji, Kimi, Fizikë, Shkenca Sociale, Qytetari, Filozofi, Histori, Gjeografi, Ekonomi, Muzikë, Art Pamor, Kërcim, Teatër, Edukim Fizik dhe TIK.

Të gjithë ata që kanë mbaruar degët e sipërpërmendura mund të ushtrojnë profesionin e mësuesit, pasi të kenë kryer formimin e nevojshëm psiko-pedagogjik, i cili do të mundësohet nga fakultetet e edukimit në institucionet e arsimit të lartë.

LEXONI GJITHASHTU:

• Gjykata Kushtetuese rrëzon Bordin e Transparencës për çmimet e ushqimeve
• Moti i keq, ministrja Kushi: 13 shkolla në Shkodër s’do të kenë mësim të hënën