Kushte të reja për turistët, kontroll aktivitetit 5-vjeçar në Facebook

Turistëve nga një duzinë vendesh të botës mund t’u kërkohet të ofrojnë aktivitetin e 5-vjeçarit të fundit në Facebook, si kusht për të hyrë në Shtetet e Bashkuara.

Kushti i ri do të prekë ato vende, qytetarët e të cilave mund të vizitojnë Amerikën për 90 ditë pa vizë, për sa kohë kanë plotësuar një Sistem Elektronik për Autorizimin e Udhëtimit, ESTA.

Me t’u kthyer në Shtëpinë e Bardhë në janar, presidenti Donald Trump ka ashpërsuar kontrollet në kufijtë amerikanë, duke cituar si motiv sigurinë kombëtare.

Analistët amerikanë thonë se plani i ri mund të kthehet në një pengesë për vizitorët, ose të dëmtojë të drejtat digjitale të tyre.

Amerika pret një fluks madhor turistësh të huaj vitin e ardhshëm, pasi do të mbajë Kupën e Botës në futboll bashkë me Kanadanë dhe Meksikën, ndërkohë që në vitin 2028 në Los Anxheles do të zhvillohen Lojërat Olimpike.

Drafti u dorëzua nga agjencia për Mbrojtjen e Kufijve dhe Doganat dhe Departamenti për Sigurinë e Brendshme, pjesë e të cilës është agjencia.

Mediat amerikane raportuan se ai u shfaq në Regjistrin Federal, që është dhe gazeta zyrtare e qeverisë së Shteteve të Bashkuara.

Në bazë të draftit, që nuk jep shpjegime mbi atë që do të kërkohet, aplikantët do të duhet të ofrojnë edhe aktivitetin e 5 viteve të fundit të tyre në rrjetin social.