Kushtetuesja në Kosovë refuzon kërkesën për pezullimin e vendimit të BQK për dinarin

Gjykata Kushtetuese e Kosovës ka shpallur të papranueshëm kërkesën e Vasilije Arsiqit, që gjykata të vlerësojë kushtetutshmërinë e rregullores të Bankës Qendrore të Kosovës, që ka hyrë në fuqi më 1 shkurt.

Kushtetuesja tha se Arsiq kishte kërkuar vendosjen e një mase të përkohshme, përkatësisht që të pezullohej zbatimi i rregullores, që parasheh euron si monedhën e vetme për pagesa me para të gatshme.

Megjithatë, Gjykata Kushtetuese konstatoi se parashtruesi nuk kishte shterur të gjitha mjetet juridike të përcaktuara me ligj për të mbështetur pretendimet për cenim të të drejtave dhe lirime themelore të njeriut.

Arsiq në kërkesën e tij kishte argumentuar se rregullorja në mënyrë të tërthortë është diskriminuese ndaj komunitetit serb, “pasi që në radhë të parë prek komunitetin serb në Kosovë edhe pse vetë rregullorja nuk përmban shprehimisht dispozita diskriminuese, fakti që zbatimi i saj është diskriminues tregon diskriminim indirekt”.

LEXONI GJITHASHTU:

• Raund i ri i dialogut për çështjen e dinarit serb
• Dështon takimi për dinarin, Lajçak: I gatshëm t’i pres palët sërish